DUMANJUG,CEBU- Nagpahibalo og hugot nga pasidaan si Dumanjug Mayor Gungun Gica batok sa mga social media post nga giingong nagpakaylap og fake news ug hulga sa kapintasan batok sa mga health worker sa lungsod.
Sa iyang Facebook post, gipanghimakak ni Gica ang alegasyon nga adunay bata nga namatay tungod sa measles vaccination sa Dumanjug.
Matud niya, false ug malicious ang maong impormasyon ug hugot nga nagsunod sa medical standards ang mga doktor, nurse ug barangay health worker sa Dumanjug Primary Care Facility atol sa immunization.
Gikondena usab sa mayor ang giingong death threats batok sa health workers, lakip ang paggamit sa mga pulong nga “tigbason” ug “demonyona” sa pipila ka social media post.
Gibutyag niya nga usa ka staff sa Bitoon ang giingong gibairan og sundang, hinungdan nga nanawagan siya og dugang seguridad alang sa mga health team.
Gisugo ni Gica ang Dumanjug Police Station nga subayon ang mga account nga giingong nagpakaylap og death threats ug disinformation ug tukion ang angay nga legal nga aksyon batok sa mga responsable.
Nanawagan usab siya sa mga ginikanan nga dili dayon motuo sa wala mapamatud-ang impormasyon bahin sa vaccination ug moduol sa mga health center alang sa hustong konsultasyon.
Matud pa ni Gica, nag-atubang ang Dumanjug sa peligro sa measles ug rubella outbreak tungod sa ubos nga vaccination coverage sa lungsod, nga anaa sa 5.8 porsyento sumala sa iyang pahayag.
Gimandoan usab niya ang mga barangay official ug tanod nga maghatag og security escort sa mga health team nga mag-house-to-house vaccination.
Gipasalig ni Gica nga panalipdan sa lokal nga panggamhanan ang mga health worker ug mga bata batok sa hulga ug disinformation nga mahimong makababag sa vaccination campaign.
