Nagpagawas og Show Cause Order ang Land Transportation Office Region VII (LTO 7) batok kang Atty. Edgar Gica, kanhi sakop sa Cebu Provincial Board ug amahan ni Dumanjug Mayor Gungun Gica, kinsa giila nga drayber sa usa ka gray nga Mercedes-Benz nga gituohang nalambigit sa usa ka hit-and-run nga insidente sa V. Rama Avenue, Cebu City, mga pasado alas 11:00 sa gabii niadtong Miyerkules, Septiyembre 9, 2026.
Kini human nga giingong nalambigit si Atty. Gica, sa sunod-sunod nga mga insidente sa kadalanan sa Siyudad sa Sugbo niadtong Miyerkules sa gabie, sumala sa usa ka opisyal gikan sa Police Station 2 sa CCPO.
Matod sa kapulisan, ang unang insidente nga naglambigit og taxi nahitabo sa Sambag 1, ug human niini, giingong gigukod sa mga barangay tanod si Atty. Gica. Nagpadayon siya paingon sa dalan Calamba ug Guadalupe, diin gibabagan siya sa mga kapulisan gikan sa Station 2.
Gibutyag sa kapulisan nga mi-“U-turn” siya ug giingong nalambigit sa laing insidente sa kadalanan sa lugar sa Calamba. Dayon, nagmaneho siya paingon sa Tres de Abril Street, diin matod sa mga awtoridad, nabanggaan sa iyang sakyanan ang usa ka bakery.
Daling miadto sa lugar sa insidente si Mayor Gica. Nangayo og sa dihang gipangayuan kini og pamahayag sa maong panghitabo, nagdumili kini sa paghatag.
Gumikan sa insidente, gipaubos kini sa imbestigasyong administratibo aron matino kung ang giingong mga buhat naglangkob ba og paglapas sa kasamtangang mga balaod sa land transportation, lakip na ang walay pagtagad o walay pag-amping nga pagpadagan sa sakyanan ug ang mga responsibilidad sa drayber nga nalambigit sa usa ka aksidente sa kadalanan.
Gimandoan si Atty. Gica nga moatubang sa LTO 7 Operations Division ug mosumiter sa iyang komento o katin-awan, uban ang mga dokumento ug ebidensya nga may kalabotan niini. Samtang nagpadayon ang imbestigasyon, gipaubos sa preventive suspension ang iyang driver’s license, ug gibutangan usab og “alarm” ang sakyanan nga nalambigit sa insidente.
Samtang, gikumpirmar sa Traffic Enforcement Unit (TEU) sa Cebu City Police Office nga nakab-ot ang usa ka kasabutan tali ni Atty. Edgar Gica ug sa mga partido nga nalambigit sa giingong hit-and-run nga insidente sa Siyudad sa Sugbo niadtong gabii sa Miyerkules, Septiyembre 9.
Apan, ang buhatan sa TEU mibalibad sa paghatag og dugang mga detalye bahin sa kasabutan.
