Giisyuhan sa Land Transportation Office (LTO) Region 7 og Show Cause Order (SCO) si Dumanjug City Mayor Efren Guntrano Zozobrado Gica subay sa usa ka nag-viral nga vehicular accident nga nahitabo niadtong Hulyo 19, 2026 sa amihanang bahin sa National Highway sa Barangay Pakigne, Minglanilla, Cebu.
Basi sa pasiunang imbestigasyon ug mga nakuhang ebidensya sa LTO, ang maong insidente naglambigit sa usa ka Toyota Hi-Ace Van ug usa ka motorsiklo.
Diin, gitumbok sa Show Cause ang pipila ka posibleng kalapasan sa Land Transportation and Traffic Code, lakip na ang Reckless Driving, pagpadagan sa sakyanan nga walay plaka, ug pagka-improper person sa pagdumala og sakyanan, uban sa uban pang administratibong silot ubos sa balaod.
Tungod niini, gimandoan si Mayor Gica nga personal nga motunga sa LTO Region 7 Operations Division sulod sa lima ka adlaw gikan sa pagdawat sa maong mando aron magsumite og nakapanumpa o verified nga sulat uban ang mga suportang ebidensya.
Samtang subay usab nagpadayon ang imbestigasyon ug alang sa kaluwasan sa publiko, gipailalom usab sa 90 ka adlaw nga preventive suspension ang driver’s license ni Mayor Gica, ug giatasan kini sa pag-surender sa iyang orihinal nga lisensya.
Subay niini, niluwat usab og pamahayag si Gica, ug nidawat sa bug-os nga responsibilidad sa maong aksidente ug miuyon nga moabaga ug mobayad sa tanang gasto sa pag-ayo sa nadaot nga van, lakip na ang posibleng lugi sa tag-iya samtang dili pa magamit ang sasakyan.
Sa usa ka pahayag nga gi-post sa iyang opisyal nga Facebook page, nangayo og kapasayloan si Mayor Gica sa tag-iya ug drayber sa van.
Isip sakop sa HPG Tigers, nangayo usab siya og pasaylo sa maong organisasyon ug gipatin-aw nga iyang personal nga sayop ang nahitabo ug dili kini salamin sa mga prayoridad ug mithi sa grupo bahin sa disiplina ug road safety.
Nipagawas usab og laing pamahayag si Mayor Gica kabahin sa iyang kalambigitan sa maong insidente, diin iyang gipasiugda nga iyang dawaton ang hingpit nga responsibilidad sa bisan unsang mga silot ug sangputanan nga mahimong motumaw alang kaniya.
