Mipahigayon og Coastal Clean-up drive ang Kagamhanang Dakbayan sa Sugbo niadtong adlaw sa Sabado, Septiyembre 6, 2025.
Gipangunahan mismo ang maong kalihokan ni Cebu City Mayor Nestor Archival Sr. ug sa Cebu City Bantay Dagat Commission sa mga kabaybayonan sa sa mga coastal barangays sa Inayawan, Cogon Pardo, Basak San Nicolas, Mambaling, Duljo-Fatima, Sawang Calero, Pasil, Suba ug Ermita.
Giinspeksyon sab ni Mayor Archival ang Forward Base sa Bantay Dagat Commission nunot sa planong palambuon kini.
Gitaganang kada buwan kini ipatuman sa kagamhanang dakbayan ang pagpanglimpyo sa kabaybayonan aron mamentinar ang kalimpyo ug kinabuhi sa mga marine sanctuary sa kadagatan sa syudad.
Sagad nga mga nakuhang basura nila kay mao ang mga plastic products sama sa bottles, cellophane ug uban pa.
Giawhag sa mga opisyales sa dakbayan nga likayan ang pataka og paglabay sa mga basura bisan asang dapit kay pwede kini mabanlas sa mga suba ug muabot sa mga kadagatan.
Miabot sa liboan ka mga indibidwal ang mipartisipar sa maong kalihokan nga kasagaran mga empleyado sa Cebu City Hall, mga nagkalain-laing ahensya sa nasudnong kagamhanan, mga tinun-an, ug mga pribadong grupo’g organisasyon
