Sikop ang usa ka kanhi opisyal sa kapulisan sa mga operatiba sa Criminal Investigation and Detection Group (CIDG) Mandaue City Field Unit tungod sa giingong ilegal nga paghupot og armas atol sa pagpatuman sa search warrant nga giisyu sa korte didto sa Sitio Biasong, Barangay Bonbon, Cebu City, niadtong Biyernes sa hapon, Oktubre 16.
Ang suspek, nga nailhan sa alyas nga “Lowell,” 40 anyos, gidakop atol sa operasyon nga gipahigayon gikan sa alas 4:10 hangtod sa alas 5:10 sa hapon sa kabukiran nga bahin sa maong barangay.
Sumala sa report sa CIDG, nakuha gikan sa suspek ang usa ka Colt .45-caliber automatic pistol uban ang magazine nga adunay sulod nga lima ka mga bala.
Ang operasyon nagsugod human adunay mireklamo nga usa ka residente, kinsa nag-ingon nga ang suspek kanunay magdala og armas—ilabi na kung hubog—ug ipakita kini samtang nag-inom, nga nakapahadlok sa mga silingan.
Human sa maong reklamo, ang CIDG-7 nagpahigayon og validation ug verification human nakadawat og impormasyon nga ang suspek giingong nagtago og mga armas ug wala matino nga gidaghanon sa mga bala sulod sa iyang pinuy-anan.
Ang warrant giisyu may kalabotan sa giingong paglapas sa Section 3 in relation to Section 28(a) sa Republic Act No. 10591, nga nailhan usab isip Comprehensive Firearms and Ammunition Regulation Act.
Matod sa usa ka sakop sa CIDG-7, ang suspek kanhi nadestino sa Cebu City Police Office una pa kini gibalhin sa probinsya sa Bohol. Giingong ni AWOL niadtong 2016 ug wala na gayod mibalik sa serbisyo.
Ang suspek nagpabilin karon sa kustodiya sa CIDG Mandaue City Field Unit ug gilaumang atubangon ang pormal nga mga kaso.
