Gikatakdang mopagawas ang Philippine National Police – Criminal Investigation and Detection Group (PNP-CIDG) og subpoena batok kang Senador Ronald “Bato” dela Rosa isip kabahin sa pag-abli pag-usab sa imbestigasyon sa kapin 100 ka mga reklamo nga may kalabotan sa giingong extrajudicial killings sa Davao Region.
Sumala ni Department of the Interior and Local Government (DILG) Secretary Jonvic Remulla, ang senador ipatawag aron personal nga moatubang sa CIDG isip kabahin sa imbestigasyon sa mga insidente sa dihang siya ang direktor sa Davao City Police Office ug regional police chief sa rehiyon.
Giklaro usab sa opisyal nga ang warrant of arrest gikan sa International Criminal Court dili i-isyu ug walay plano nga dakpon si dela Rosa.
Giklaro usab sa CIDG nga gusto niini nga direktang makuha ang bahin ni dela Rosa, kinsa mao usab ang kanhi hepe sa Philippine National Police atol sa kinapungkayan sa kampanya sa gubat batok sa droga sa miaging administrasyon.
Sa laing bahin, ang mga tugpahanan, pantalan, ug uban pang mga exit point sa nasud gibutang usab sa alert status aron mabantayan ang mga lihok sa senador ug ang posibleng mga pagbiya samtang nagpadayon ang imbestigasyon.
