Gihatagan hangtod sa Sept. 30, 2025 aron magparehistro alang sa E-Commerce Philippine Trustmark (Trustmark) ang mga negosyo nga adunay online presence, usa ka lakang nga gitumong aron matubag ang mga kabalaka sa mga konsumidor, sumala sa Department of Trade and Industry (DTI) niadtong Huwebes, Septiyembre 11, 2025.
Ang mga online merchant gimanduan sa DTI, sa usa ka Department Administrative Order, nga magparehistro alang sa Trustmark aron madugangan ang pagsalig sa mga konsumidor sa electric commerce (e-commerce) space ug sa pagsunod sa Republic Act 11967, o nailhan nga Internet Transactions Act of 2023.
Matod pa nga ang mandatory registration kay direktang tubag sa pagsulbong sa mga reklamo sa mga konsumidor diin adunay natalang 13,000 ka mga reklamo sukad pagsugod karong tuiga.
Ubos sa Internet Transactions Act of 2023, ang mga konsumidor mahimong mosang-at og damage claims batok sa mga nasayop nga online nga negosyo atubangan sa korte o sa DTI.
Gitakda na ang mga silot, diin ang ikatulo ug sunodsunod nga mga kalapasan gipahamtangan og P1 milyon nga multa.
