Nangandam na ang Philippine National Police (PNP) sa posibleng mga protesta o demonstrasyon sa Pilipinas susama sa Indonesia ug Nepal tungod sa kontrobersiya sa kurapsyon sa mga flood control projects.
Matod ni PNP acting chief Police Lieutenant General Jose Melencio Nartatez Jr., adunay mga plano sa seguridad alang sa paglikay, crowd control ug pagsiguro sa seguridad.
Adunay impormasyon usab ang nasudnong kapulisan nga magamit unta sa ilang mga operasyon.
Padayon usab ang pagmonitor sa PNP sa kalinaw ug kahapsay ug kaluwasan sa tibuok nasud.
Kahinumdoman nga sa niaging mga adlaw, daghang mga grupo ang mihimo og mga lihok protesta taliwala sa gikataho nga kurapsyon sa mga proyekto sa flood control sa gobyerno samtang daghang mga lugar sa nasud ang nalumos sa lapad nga pagbaha tungod sa kusog nga ulan sa miaging mga buwan.
Ang sama nga senaryo nahitabo usab sa ubang mga nasud sama sa Nepal tungod sa korapsyon ug mga kahiwian apan ang mga demonstrasyon didto mas grabe kung diin gisulong sa mga nagprotesta ang parliamento ug gisunog ang mga balay sa daghang mga politiko.
Ang kaylap nga mga protesta ug demonstrasyon sa nasangpit nga nasud nagsugod niadtong Septiyembre 8, kasagaran gi-organisa sa mga estudyante sa “Gen Z” ug uban pang grupo sa kabatan-onan.
Sa Indonesia, liboan ka mga tawo ang nagprotesta sa gawas sa ilang parliamento agig protesta batok sa pagtaas sa mga allowance sa pabalay alang sa mga miyembro sa parliamento nga nagsugod kaniadtong Agosto 25 ning tuiga.
