TALISAY CITY,CEBU- Nakaplagan ang patayng-lawas sa usa ka wala mailhing lalaki sa usa ka liblib nga dalan sa Barangay Manipis, Dakbayan sa Talisay, karong buntag, Setyembre 15, 2025.
Sumala sa inisyal nga imbestigasyon sa kapulisan ug impormasyon nga nakuha gikan sa Bombo Radyo Cebu, adunay samad sa nawong nga pinusilan ang biktima.
Gitabunan usab ang ulo niini gamit ang itom nga panapton.
Nakaplagan usab nga gihiktan ang mga kamot sa biktima gamit lamang ang scotch tape, hinungdan nga gituohan nga posible kini nga gi-salvage.
Nasorpresa ang mga otoridad sa pagkakaplag og sulat nga gibutang tapad sa tiil sa biktima, nga nag-ingon: “Wag Tularan! Drug Addict Ako.” Kini posibleng mensahe nga gustong ipaabot sa publiko gikan sa mga responsable sa krimen.
Padayon ang imbestigasyon sa kapulisan aron masuta ang motibo sa krimen, samtang gihimo na usab ang crime scene processing sa mga sakop sa Scene of the Crime Operatives (SOCO) aron makuha ang dugang ebidensya.
Ang patay’ng lawas gidala na sa Saint Francis Funeral Homes samtang gipaabot ang positibong pagkaila niini pinaagi sa mga missing person reports o sa mga saksi nga motunol og impormasyon.
Nagpabilin nga abli ang imbestigasyon sa maong brutal nga insidente samtang giusisa usab ang posibilidad nga may kalambigitan kini sa illegal nga droga.
