Gikompirmar sa National Bureau of Investigation in Central Visayas (NBI-7) nga padayon gihapon nga nag-operate sa Sugbo ang mga illegal scam hubs ug Philippine Offshore Gaming Operators (POGO) hubs.
Matud ni NBI-7 spokesperson ug Investigation Agent III Maria Contessa Lastimoso nga bag-o lang gironda sa bureau ang tulo ka scam hubs sa probinsiya, diin ang usa nahimutang sulod sa subdivision sa dakbayan sa Lapu-Lapu, usa sa subdivision ug usa sa opisina sa dakbayan sa Sugbo.
Namatikdan usab nila nga ang mga operasyon kanunay nga naglikay sa dagkong mga establisemento sa komersyo, inay mobalhin sa mga lugar nga gipuy-an o mga subdivision aron dili makit-an.
Gidugang ni Lastimoso nga kini nga mga scam hub kasagarang gipangulohan sa labing menos duha ka mga langyaw ug gisuportahan sa daghang mga trabahanteng Pinoy.
Nasayran nga ang ilang pamaagi kay naglakip sa “butchery-type” scams, love scams, investment scams, ug uban pang malimbungon nga mga kalihokan.
Ingon man nga giklaro usab niini nga ang mga trabahanteng Filipino nga malambigit, bisan igo lang sila nga nagsilbi nga agents kay mag-atubang gihapon sila og kaso, ilabina sulod sa Revised Penal Code ug Republic Acts nga naglangkob sa cybercrime ug syndicated estafa.
