Kusganong gikondena ni Senador Erwin Tulfo ang giingong dayag ug sistematikong korapsyon sulod sa Philippine Contractors Accreditation Board (PCAB).
Matod ni Tulfo, ang Republic Act No. 4566 o ang Contractors’ License Law nga magsilbi untang giya ug proteksyon sa construction industry nahimo nang himan sa pag-abuso, kahakog, ug korapsyon.
Gitataw sa senador nga daghang mga sakop sa PCAB mismo ang nakakuha og binilyon nga kontrata gikan sa gobyerno. Apil na niini si Engineer Erni Baggao, board member sa PCAB ug tag-iya sa EGB Construction Corporation, nga giingong nakakuha og P7.7 bilyones nga flood control projects gikan sa 2022 hangtod 2025.
Dugang pa ni Tulfo nga ang maong kompanya nalambigit usab sa mga taho sa overpriced, substandard, ug ghost projects, lakip na ang giingong operasyon sa Wawao Builders sa Bulacan. Gihisgotan sab niya si Engineer Arthur Escalante, laing opisyal sa PCAB, nga giingong nakakuha sab og dagkong kontrata sa gobyerno.
Tungod niini, nisang-at ang senador sa Senate Bill No. 1373 o Act Strengthening the Contractor’s License Law, nga nagtinguha sa pagpahugot sa regulasyon ug pagdili sa mga sakop sa PCAB sa pag-apil sa bisan unsang kontrata sa gobyerno samtang anaa sa katungdanan, lakip na ang pagpahamtang og cooling-off period human sa ilang termino.
