Nainstalar na ang anaa sa lima ka mga state-of-the-art dental chairs nga adunay built-in X-ray sa mga tambalanan sa probinsya sa Sugbo nga gidumala sa Kapitolyo.
Kini subay sa kamanduan nga giluwat ni Cebu Provincial Governor Pamela “Pam” Baricuatro sa pasaad nga palambuon ang healthcare system sa probinsya.
Ang mga tambalanan nga natauran sa maong modernong kahimanan kay ang provincial hospital nga anaa sa dakbayan sa Danao ug lungsod sa Balamban ug ang tulo ka mga district hospital sa lungsod sa Sogod, Tuburan, ug Minglanilla.
Anaa sa siyam ka mga dental chairs ang gitaganang gipalit sa Kapitolyo atol sa initial phase niini sa pagpalambo sa dental care services sa 16 ka mga tambalanan nga gidumala sa Kagamhanang Lalawigan.
Sumala pa ni Dr. Nikki Catalan, ang Provincial Health Consultant nga nagtinguha sila sa Kapitolyo nga mapaspasan ang modernisasyon sa mga medical equipments samtang gipalambo ang mga imprastruktura sa mga tambalanan.
