Gipahibalo sa Department of Energy (DOE) nga target sa Pilipinas nga makagama og elektrisidad gikan sa nuclear energy sa 2032.
Matod ni Patrick Aquino, ang DOE director ug technical secretariat sa Nuclear Energy Program Inter-Agency Committee (NEP-IAC) nga ang gobyerno anaa na sa bahin sa pagpatuman niini human sa pipila ka tuig nga pagpangandam.
Ang tuig 2026 gikonsiderar nga usa ka “turning point” kung diin ang mga pagpangandam palig-onon bahin sa polisiya, institusyonal, imprastraktura, ug pagsalig sa publiko.
Atol sa Philippine International Nuclear Supply Chain Forum (PINSCF) 2025, gikataho usab nga 9 sa 14 ka rekomendasyon sa International Atomic Energy Agency (IAEA) gikan sa 2018 ang natuman sa nasud.
Laing dakong kalampusan mao ang pagpasar sa Republic Act No. 12305 o ang Philippine Atomic Energy Regulatory Authority (PhilATOM) Act, nga nagsilbi nga legal nga basehan sa pag-regulate sa nuclear energy.
Nagkadako usab ang suporta sa publiko, uban sa usa ka nationwide survey nga nagpakita nga labaw sa 70% sa mga Pilipino ang nagtuo nga ang nuclear power makatabang sa pagsulbad sa kakulang sa elektrisidad, pagpakunhod sa importasyon sa lana, pagmugna og mga trabaho, ug pakigbatok sa kausaban sa klima.
Si Aquino miingon nga importante alang sa nasud nga makakat-on gikan sa mga nasud nga adunay aktibong nuclear plants sama sa U.S., South Korea, ug Canada.
