Gikondenar sa Department of Social Welfare and Development (DSWD) ang dili awtorisado nga paggamit sa logo sa ahensya.
Hugot nga gipahimangnoan sa ahensya ang mga mopahimulos sa katalagman sa pagbaligya sa mga relief goods.
Kini ang pamahayag ni DSWD Assistant Secretary Irene Dumlao, nunot sa pagkumpiskar sa mga kahimanan sa ahensya nga adunay opisyal nga logo sa usa ka bodega sa Tondo, Manila sa PNP-CIDG.
Nakit-an usab sa maong lugar ang mga butang nga daw giputos nga mga relief goods nga adunay logo sa DSWD nga giingong giplanohang ibaligya.
Matod ni Dumlao nga ang maong bodega dili konektado sa DSWD ug walay bisan usa sa mga kawani niini ang nalambigit sa ilegal nga kalihokan.
Busa, nanawagan si Dumlao nga hunongon na ang paggamit sa ahensya alang sa personal nga kaayohan.
Gipasalig sa departamento ang hingpit nga suporta sa nagpadayon nga imbestigasyon sa pulisya aron mapatubag ang mga responsable.
