CEBU CITY- Gibuhat ang Supplemental Budget (SB) 2 alang sa preparasyon ug giaprobahan sa Cebu City Government SB 2 gikan sa executive nga mokabat sa P81,395,000, nga igahin alang sa livelihood program, sa nagkadaghang benepisyaryo sa senior citizen financial aid, ug sa pag-aspalto sa nagkadaiyang kadalanan sa dakbayan sa Sugbo.
Kini ang gipaambit ni Committee on Budget and Finance Chairman Konsehal Dave Tumulak atol sa pakighinabi sa Bombo Newsteam diin matud niini nga ipasaka batok sa savings sa kagamhanan sa dakbayan nga mokabat sa P489 milyones sa ikatulong quarter human maputol ang mga galastohan sa “unnecessary” nga paggasto sama sa langyaw nga pagbiyahe sa mga empleyado ug opisyal sa gobyerno.
Labing minos P550,000 niini nga kantidad alang sa livelihood program sa Office of the Mayor, apan wala pa masayod kung unsa nga mga programa ang gahinan niini.
Samtang sa senior citizen financial aid kay nagbutang sila og P40 million alang sa pag-apud-apod sa buwan sa Disyembre.
Gidugang usab niini nga kinahanglan silang mangayo og dugang budget human mahibaw-an nga ang giaprobahan kaniadto nga budget alang sa hinabang sa mga senior dili igo tungod sa pagsaka sa gidaghanon sa mga benepisyaryo sa ikaduhang quarter ning tuiga.
Sa laing bahin, si Tumulak miingon nga ang executive department wala pa makapadala sa ilang budget proposal alang sa 2026. Diin nidugang nga ang City Council nipasar na og resolusyon nga nag-awhag sa ehekutibo sa pagsumiter sa ilang mga proposal sa sayo pa aron tugotan ang pagpahigayon sa budget hearing marathons sa Oktubre.
Ingon man nga ilang target nga mahuman na ang budget deliberations sa katapusan sa Nobiyembre.
