Giklaro sa Malacañang nga wala sa plano sa administrasyon ang pagbungkag sa Independent Commission for Infrastructure (ICI), bisan pa sa pagtudlo sa bag-ong Ombudsman nga mosusi sa mga anomaliya sa mga proyekto sa pagpugong sa baha.
Sa pahayag ni Presidential Communications Office Undersecretary Atty. Claire Castro, iyang giingon nga dili lang limitado sa mga isyu sa flood control ang sakop sa bag-ong Ombudsman.
Matod pa niya, daghan pang mga kaso ang kinahanglan atimanon nga wala masakop sa mandato sa ICI.
Tubag kini sa pangutana kon aduna bay posibilidad nga bungkagon ang ICI ug itugyan na lang sa Ombudsman ang tanang imbestigasyon.
Matod ni Castro, dili praktikal nga usa lang ka ahensya ang molihok, ilabi na sa kadaghan sa mga reklamong kinahanglan imbestigahon.
Gipasabot usab ni Castro nga dili kini pagdoble sa trabaho sa Ombudsman, sama sa gituohan sa ubang kritiko, kondili usa ka lakang aron mapaspas ang proseso sa hustisya.
Dugang pa niya, ang presensya sa usa ka independent body sama sa ICI makatabang sa preliminary review, aron sa dihang marekomendar na ang kaso sa DOJ o Ombudsman, kompleto na ang dokumento ug lig-on ang ebidensya.
