Gibutyag sa kapulisan sa United Kingdom nga ang suspek nga miatake sa synagogue sa Manchester adunay kalambigitan sa teroristang grupong ISIS.
Ang pag-atake nagbilin sa duha ka mga tawo nga namatay ug daghang uban pa ang nasamdan.
Sumala sa counterterror police sa United Kingdom, ang suspek nga si Jihad al-Shamie, miangkon nga una niyang gitawagan ang emergency service ug mideklarar nga gisugo siya sa ISIS.
Kahinumduman nga giatake sa suspek ang Heaton Park Hebrew Congregation Synagogue sa Manchester.
Kung diin, ang 35-anyos nga British citizen ug Syrian descent mitawag sa telepono human gidaro ang iyang sakyanan ngadto sa mga tawo ug gidunggab sila niadtong Oktubre 2.
Sa samang insidente, aksidenteng napusilan sa usa ka pulis ang biktima nga si Adrian Daulby, 53-anyos.
Nagpadayon usab ang imbestigasyon sa mga otoridad kung aduna bay laing kauban ang suspek sa pag-atake.
