Mipadayag og suporta si Rep. Duke Frasco, sa ikalimang Distrito kang Board Member Celestino “Tining” Martinez III human sa privilege speech nga misaway sa pagtubag sa Cebu Provincial Government sa 6.9-magnitude nga linog nga miigo sa amihanang bahin sa Sugbo.
Sa usa ka opisyal nga pamahayag, giila ni Frasco ang ka-isog ni Martinez sa pagsulti sa tinuod ug iyang gidayeg ang board member sa pagpahayag sa giingon nga kapakyasan sa pagpangulo sa kapitolyo taliwala sa krisis.
Giangkon usab ni Frasco nga adunay mga online attacks ug porma sa “bullying” batok kang Martinez, nga iyang giila nga paningkamot sa pagpahilom sa mga kritiko sa liderato sa probinsya.
Sa sesyon sa Sangguniang Panlalawigan niadtong Oktubre 6, gisaway ni Martinez ang kakulang sa koordinasyon ug komunikasyon tali sa Provincial Government ug mga LGUs human sa linog.
Gikwestiyon niya ang kahinay sa aksyon ug plano sa Kapitolyo, halos usa ka semana human sa katalagman.
Subay niini, gikuhaan og habig sa Bombo Newsteam si Board Member Martinez, dinhi, iyahang gipasabot nga isipon lamang kini ni Governor Pamela Baricuatro nga usa ka constructive criticism o suhestiyon ang iyang privileged speech atol sa session sa lokal nga kagamhanan sa probinsiya.
Gibutyag ni Martinez nga ang tumong sa iyahang mensahe atol sa session, dili pagpangdaot sa gobernadora apan pagkuwestiyon kung unsay sunod nga lakang nga pagahimoun human sa linog.
