Nagpirmahay na sa kasabutan sa ceasefire ug hostage deal ang nasud nga Israel og ang Palestinong militanteng grupo nga Hamas niadtong Huwebes, Oktubre 9, 2025.
Kini nga kasabutan kay kabahin sa unang hugna sa kalinaw nga gipatung-an ni US President Donald Trump sa inisyatiba niining tapuson ang gyera sa Gaza.
Ang mga opisyal sa duha ka habig kay gikumpirmar ang maong panagsabot human sa indirect talks niini sa Sharm el-Sheikh sa Egypt diin ang anunsyo niini nakamugna og kamaya sa mga Palestino ug mga Israeli.
Ubos sa maong peace deal, nagtinguha kini sa malungtarong kalinaw, paghupa sa gubat, ingopn man sa pagbiya sa mga pwersa sa Israel sa Gaza ug ang pagbuhi sa Hamas sa mga bihag niini.
Matod pa ni Israeli Prime Minister Benjamin Netanyahu nga mu-epekto ang ceasefire sa dihang ma-ratify sa ilang gobyerno ang kasabutan.
Apan sa pikas bahin, masaksihan gihapon sa Northern Gaza ang pipila ka mga pagpamomba sa mga pwersa sa Israel pipila ka oras human sa anunsyo sa pagpirma sa kasabutan sa kalinaw.
Gani sa pagkakaron, gipangulohan sa France ang panagtapok sa mga foreign ministers sa Paris aron dugang nga pagatukion ang inisyatiba sa pagtapos sa gyera sa Gaza.
