Gibasura sa International Criminal Court (ICC) ang hangyo ni kanhi Presidente Rodrigo Duterte nga provisional release samtang gihusay ang mga kaso batok kaniya.
Ang Pre-Trial Chamber I sa ICC nagmando nga ang iyang detensyon nagpabilin nga gikinahanglan sumala sa mga probisyon sa Rome Statute.
Sa desisyon niini, gipasiugda sa korte nga ang padayong detensyon ni Duterte makatarunganon sa kabug-at sa mga kaso, ang panginahanglan sa pagsiguro nga siya mobarog sa husay, ug aron malikayan ang posibleng pagpanghilabot sa imbestigasyon o pagpanghulga sa mga biktima ug mga saksi.
Si Duterte anaa sa kustodiya sa ICC sa The Hague sukad niadtong Marso 2025, may kalabotan sa tulo ka ihap sa pagpatay nga gikonsiderar nga “crimes against humanity” tungod sa iyang kontrobersyal nga kampanya batok sa droga atol sa iyang paglingkod.
Niadtong Hunyo, ang iyang kampo nagsang-at og petisyon alang sa temporaryo nga pagpagawas, nga naghisgot sa mga rason sama sa giingong dili maayong panglawas ug kakuwang sa kapasidad sa paghusay. Ang iyang mga abogado niingon usab nga ang kasamtangang administrasyon wala mosupak sa iyang temporaryong kagawasan—usa ka pangangkon nga sa ulahi gihimakak sa Malacañang.
Gisupak sa ICC Office of the Prosecutor ang hangyo, nga miinsistir nga ang mga alegasyon bahin sa kahimsog ni Duterte kinahanglan nga imbestigahan pag-ayo. Ang Office of Public Counsel for Victims nipadayag usab og kabalaka sa posibleng pagkalangan sa hustisya sa mga pamilya sa mga biktima sa drug war.
