Miawhag sa mga local airlines ang Civil Aeronautics Board (CAB) nga tabangan ang mga pasahero nga naapektuhan sa magnitude 7.4 nga linog nga miigo sa baybayon sa Manay, Davao Oriental, niadtong Biyernes sa buntag.
Sa usa ka advisory, giawhag sa CAB ang mga airlines nga “maghatag ug flexible ug compassionate nga mga lakang sa accommodation sa mga pasahero,” lakip na ang pag-waive sa rebooking ug cancellation fees ug full refunds, conversion sa mga ticket ngadto sa travel funds/voucher, ingon man alokasyon sa libreng cargo space para sa humanitarian ug relief efforts, ubos sa safety ug operational limitations sa airlines.
Epektibo ang advisory sulod sa 30 ka adlaw gawas lang kung bawion o lugwayan kini.
Sa sayo pa, ang Civil Aviation Authority of the Philippines (CAAP) nitaho nga ang tanang mga tugpahanan nga sakop sa ilang hurisdiksyon nagpabiling operational bisan pa sa kusog nga linog.
Duha ka flights paingon sa Davao City ang gi-divert sa Mactan-Cebu International Airport ug General Santos International Airport.
