CEBU CITY- Posibleng mag-atubang ug kaso ang lokal nga kagamhanan sa dakbayan sa Sugbo, gumikan sa matud pa kahiwian ug mga kalapasan nga nakita sa konseho ngadto na pagpahigayun sa “night market” ug sa wala pagsunod sa saktong proseso niini.
Matud ni Cebu City Councilour Jun Alcover, nga giapbrobahan nila ang resolusyon nga nagpasira sa “night market” gikan sa Septiyembre 05, ngadto na sa Oktubre 05, 2025 apan padayun lang gihapon ang operasyon niini.
Dugang usab sa opisyal nga usa usab sa rason nga nakalapas kini mao ang pagpatukod sa mga tindahan gikan sa Pelaez Street ngadto na sa Mabini Street nga sukwahi sa gilatid sa giaprobahang resolusyon.
Gibutyag usab ni Alcover ang mga discrepancies sa pagpaabang sa maong mga tindahan diin imbis 100 ra ka tindahan ang narehistro ug kolektahan sa licensing office apan sa pagsusi niini miabut na sa 1,000 ang miokupar niini.
Gikuwestiyon usab niini ang mi organisar sa maong night market nga nailhang si Abraham Mark Dianalan– nga matud pa dili residente sa dakbayan apan residente sa dakbayan sa Lapu-Lapu.
Lakip usab niini nga gikuwestiyon ang wala pagpatawag ni Archival ngadto sa GASA-board diin maoy gitahasan sa pagpahigayun ug pagbuhat og mga polisiya alang sa mga illegal nga transaksiyon sa night market.
Gihimug-atan usab ni Alcover nga dili gayud kini niya undangan ug possible gayud nga adunay mapriso gumikan sa kahiwian niini.
