Nasikop ang tulo ka mga Korean national nga gikatahong wanted tungod sa dinagkong pagpanikas ug ubos sa red notice sa Interpol sa Pardo Hills, Barangay Pardo, dakbayan sa Sugbo, niadtong Oktubre 16.
Gipangulohan ang malampuson nga pagkasikop sa mga langyaw sa mga sakop sa Criminal Investigation and Detection Group (CIDG)–Mandaue City Field Unit.
Atol sa pagdakop adunay usa ka opisyal sa Korean National Police usab ang mikuyog sa CIDG aron magsilbing translator.
Giila ang mga suspek nga sila si Kim Joohyun, 43-anyos; Jung Won Ki, 44-anyos; ug Ha Yousung, 44-anyos nga kasamtangang nagpuyo sa Pardo Hills, Barangay Pardo.
Nilusad og manhunt operation ang CIDG-Mandaue Field Unit, kauban ang Bureau of Immigration-Fugitive Search Unit ug ang Navy Intelligence Service Group-Central aron pagsilbi sa Interpol red notices.
Nasayran nga nakadawat ang mga otoridad og intelligence report kapin sa usa ka buwan ang milabay gikan sa CIDG 7, BI-Fugitive Search Unit, ug Naval Intelligence and Security Group kalabot sa presensya sa tulo ka wanted nga Koreans sa naasoy nga lugar.
Gipaubos ang mga suspek sa surveillance, ug gisubay sa mga awtoridad ang ilang pinuy-anan, hinungdan nga ilang nasubay ug nadakpan.
Matod sa CIDG, ang mga suspek kay giingong nagkunsabo sa pagpalsipikar sa mga dokumento sa pautang aron makapalit og mga sakyanan. Bisan pa, ang mga salakyanan adunay depekto o wala magamit.
Gikataho usab nga gipeke nila ang mga vehicle performance reports pinaagi sa pagbalhin sa mga plaka gikan sa mga depekto nga mga sakyanan ngadto sa mga magamit aron makita nga sila nakapalit og bag-ong mga sakyanan.
