Nahagsa sa katubigan sa South China Sea ang usa ka US Navy helicopter ug fighter jet sa managlahing insidente niadtong Domingo sa hapon, Oktubre 26.
Sa usa ka pahayag nga gipagawas sa US Pacific Fleet karung adlawa, Lunes, Oktubre 27, ang unang insidente sa pagkahagsa naglambigit sa usa ka helicopter sa US Navy MH-60R Sea Hawk, nga nadestino sa “Battle Cats” sa Helicopter Maritime Strike Squadron 73.
Kung diin, nahagsa ang helicopter sa gikuwestiyon nga katubigan samtang nagpahigayon og routine operations gikan sa aircraft carrier nga USS Nimitz.
Ang tanang tulo ka tripulante luwas nga nakuha sa mga search and rescue assets gikan sa Carrier Strike Group.
Human sa insidente, mga 30 minutos ang milabay, usa ka F/A 18F Super Hornet fighter nga nadestino sa Fighting Redcocks sa Strike Fighter Squadron 22 ang nahagsa sa gikuwestiyon nga katubigan samtang nagpahigayon usab og routine operations gikan sa Nimitz.
Ang mga tripulante malampusong naluwas ug sa mga search and rescue assets gikan sa Carrier Strike Group 11.
Hinuon, ang tanang personnel nga nalambigit sa maong mga insidente luwas ug anaa sa maayong kondisyon.
Sa pagkakaron, padayon pa nga giimbestigahan sa hinungdan sa pagkahagsa sa helicopter ug fighter jet sa US Navy.
