MANDAUE CITY- Gisubli ni Mayor Thadeo Jovito “Jonkie” Ouano sa Dakbayan sa Mandaue ang pasalig sa iyang administrasyon sa kalinaw ug kahusay, ug gipahibalo ang mga plano nga opisyal nga itugyan ang mga service firearms sa siyudad ngadto sa Mandaue City Police Office (MCPO), nga nagsiguro sa kaluwasan, hustong pagbansay, ug responsable nga pagdumala sa armas.
Matud ni Ouano, nga ang kagamhanan sa Dakbayan sa Mandaue dugay nang nakig-alayon kang MCPO Director Police Colonel Cirilo Acosta Jr. mahitungod sa hustong pag-dispose sa mga armas, nga naglakip sa mga service pistol, rifle, ug uban pang high-powered nga armas nga nakuha kaniadto sa lokal nga kagamhanan.
Dugang ni Ouano nga ang mga armas anaa na sa kustodiya sa MCPO ug ang proseso sa pagtugyan niini usa ka pormalidad lamang.
Giangkon usab niini nga wala siya masayod sa hinungdan sa pagpalit niining mga armas sa miaging administrasyon, apan base sa pagsabut niini, ang maong mga armas gipahulam kaniadto sa mga kapitan sa barangay niadtong sa nakalabayng administrasyon.
Sigon usab ni Ouano, nga kini nga lakang gikinahanglan tungod kay ang pagkuha ug pagmentinar sa mga lisensya sa armas nahimong mas komplikado.
Gipasiugda usab sa Mayor nga wala siyay tuyo nga mogahin og dugang pondo para sa mga armas nga dili gamiton, tungod sa mga kabalaka bahin sa praktikalidad ug kaluwasan.
Gihimug-atan niini nga ang prayoridad sa iyang administrasyon mao ang pagmintinar sa kalinaw ug kahusay sa Dakbayan sa Mandaue.
Dugang pa sa Mayor nga ang Dakbayan nag-focus sa paghatag og mga gamit pangpanalipod sa mga pulis sama sa helmet ug body armor aron masiguro ang ilang kaluwasan samtang nag-duty.
