Gipahibalo sa Independent Commission for Infrastructure (ICI) niadtong Martes, Oktubre 28 nga miisyu sila og subpoena sa missing nga si kanhi Ako Bicol Party-list Rep. Elizaldy “Zaldy” Co aron sa pag-atubang sa imbestigasyon.
Sa mensahe sa mga tigbalita, si ICI Executive Director Brian Keith Hosaka mitaho nga ang subpoena kay gipadala sa “last known address” ni Co sa Pasig ug Bicol.
Pinetsahan ang subpoena niadtogn Oktubre 20 nga gitakda ang pagdungog sa Nobyembre 11 ug 12.
Kahinumduman nga unang gipatawag si Co sa komisyon niadtong Oktubre 8 apan wala kini nagpatim-aw.
Ang kanhi chairman sa House Appropriations Committee giakusahan nga nakadawat og kickback gikan sa mga kwestiyonableng proyekto sa flood control.
Gituohan nga anaa kini karon sa Estados Unidos aron magpatambal sa dihang nalambigit siya sa giingong mga iregularidad sa mga proyekto sa public works.
Mi-resign si Co gikan sa House of Representatives niadtong Septiyembre 29.
