Gibakwi sa upat ka lalaking miyembro nga nagpaila sa ilang kaugalingon nga mga kanhi bodyguard ni kanhi Ako Bicol Party-list Representative Zaldy Co sa ilang nangaging mga pasangil.
Sa usa ka bag-ong gipanumpaang pahayag sa mga nagpailang security ni Co, gikanayon nila nga ang ilang nangaging mga pahayag nga naglambigit kang Presidente Ferdinand Marcos Jr., kanhi House Speaker ug Leyte 1st District Representative Martin Romualdez, Zaldy Co, ug uban pang mga personalidad sa giingong pag-apod-apod sa maleta sa kwarta dili tinuod.
Sumala kanila, gipirmahan nila ang hiniusang affidavit tungod sa saad sa pinansyal nga tabang ug seguridad alang sa ilang mga pamilya. Apan karon gusto na lang nila nga magpuyo nga hilom tungod sa mga hulga sa ilang kinabuhi ug sa daghang mga kaso nga ilang giatubang.
Tulo sa upat ka lalaki ang miingon nga ang ilang nangaging mga affidavit gisumite sa Office of the Ombudsman, nga gigamit karon sa imbestigasyon ni Romualdez ug uban pa.
Giangkon usab nila nga sa dihang mitungha sila sa Ombudsman, gipugos kuno sila sa pagpirma sa usa ka hinimo-himo nga affidavit ug gihulga nga kasuhan kung dili sila motuman.
Bisan pa, ang “maleta boys” miingon nga boluntaryo silang naghimo ug mipirma sa ilang bag-ong mga affidavit karong adlawa.
Giingong gikonsiderar usab nila ang pag-atras sa ilang inisyal nga pahayag sulod sa duha ka bulan hangtod nga nakahukom sila nga motambong karong adlawa.
Dugang pa, ang ilang ubang mga kauban nagkonsiderar usab sa pag-apil kanila.
Mahinumduman nga niadtong Pebrero 2026, 18 ka mga lalaki nga nagpaila sa ilang kaugalingon nga kanhing security personnel sa Zaldy Co ang nagsang-at og mga affidavit nga nag-angkon nga sila kuno ang naghatud og mga maleta nga puno sa kwarta kang Presidente Marcos, Romualdez, Co, ug uban pang mga personalidad.
Padayon nga gipangayo sa Bombo Radyo ang reaksyon sa Office of the Ombudsman ug sa abogado sa kanhing mga bodyguard, si Atty. Levito Baligod bahin sa bag-ong mga alegasyon ug pagbawi sa ilang nangaging mga affidavit.
