Gikatahong andam nga moatubang si kanhi House Speaker ug Leyte 1st District Rep. Martin Romualdez sa Office of the Ombudsman sa pasiunang imbestigasyon niini sa giingong mga anomaliya sa mga flood control project.
Sumala ni Atty. Ade Fajardo, abogado ni Romualdez, ang kongresista motubag sa tanang mga pasangil batok kaniya apan miinsistir nga ang iyang gipangayo lang kay usa ka patas nga proseso.
Dugang pa niiini nga walay plano si Romualdez nga mobiya sa nasud ug nagpadayon sa pagtuman sa iyang mga katungdanan isip representante sa Unang Distrito sa Leyte.
Sa samang higayon, gisubli sa kampo ni Romualdez nga walay ebidensya nga naglambigit sa magbabalaod sa giingong mga iregularidad sa mga proyekto sa pagkontrol sa baha.
Sumala sa abogado, si Romualdez walay papel sa pagporma sa 2025 national budget gawas sa pagpirma niini, ug giingong wala usab siyay kalabotan sa pagpatuman sa mga proyekto sa pagkontrol sa baha. Miingon siya nga kini usa usab sa mga nakaplagan sa Independent Commission on Infrastructure (ICI).
Gikuwestiyon usab ni Fajardo ang kredibilidad sa 18 ka giingong “maleta boys” nga giingong kanhi bodyguard ni kanhi Ako Bicol Party-list Rep. Zaldy Co, kinsa lakip sa mga saksi nga magamit sa imbestigasyon sa Ombudsman.
Giinsistir niya nga walay angay tuohan sa ilang mga pamahayag tungod kay ang Department of Justice mismo kuno ang nagsang-at og kasong perjury batok kanila, nga nagpamatuod nga sila namakak ubos sa panumpa.
