BOGO CITY,CEBU- Nahimong ghost town ang Sityo Laray, Barangay Binabag, Bogo City, human sa makusog nga linog nga miigo sa dakbayan niadtong Setyembre 30, 2025.
Hangtod karon, halos usa ka bulan na ang milabay apan wala pa gihapon mibalik ang mga residente sa ilang mga panimalay tungod sa trauma ug kahadlok nga basin mobalik pa ang linog.
Ang uban kanila temporaryong nagpuyo sa mga evacuation centers, samtang ang pipila nangita og laing dapit aron makapadayon sa ilang panginabuhi.
Kung kahinumduman, 15 ka mga indibidwal ang namatay atol sa paglinog, diin 11 niini gidungan sa paglubong, samtang daghan usab ang nasamdan ug nawagtangan og balay.
Sa pakighinabi sa Bombo News Team, kang Jay-Ar Maldo, usa sa mga residente sa Sityo Laray, mibutyag sa iyang tinuod nga kasinatian atol sa makusog nga linog.
Matod pa niya, tulog na ang kadaghanan sa iyang mga silingan atong higayona ug siya ra ang nagmata.
Gisaysay usab ni Maldo nga swerte siya nga wala maigo sa nangaligid nga mga bato, ug bisan pa man sa iyang pagkabuhi, isa sa mga sakop sa ilahang pamilya ang namatay sa maong trahedya.
Sumala sa mga otoridad, daghang kabalayan sa maong lugar ang naguba o delikado nang puy-an, hinungdan nga gideklarar kini nga unsafe zone hangtod matapos ang assessment sa mga inhenyero.
Samtang ang Lokal nga Pangagamhanan sa Bogo City nagpadayon sa pagtabang sa mga apektadong pamilya pinaagi sa relief assistance, housing evaluation, ug psychosocial intervention aron matabangan silang makabawi gikan sa trauma.
Apan sa pagkakaron, nagpabiling hilum ug walay kahayag ang Sityo Laray, usa ka dapit nga kaniadto puno sa kinabuhi, apan karon usa na lang ka pahimangno sa gahom sa kinaiyahan ug sa kaisog sa mga nakasurvive.
