PROVINCE OF CEBU- Personal nga nibisita si Acting Chief sa Philippine National Police (PNP), si Lieutenant General Jose Melencio Nartatez Jr., sa haya sa namatay nga si PCPT Joel H. Deiparine gahapong adlawa, Oktubre 31, 2025, sa Dakbayan sa Talisay, Cebu, aron paghatag sa iyang respeto ug pagpaabot sa kinasingkasing nga pahasubo sa nagbangotan nga pamilya.
Atol sa pagbisita, giila ni Lt. Gen. Nartatez ang bililhong serbisyo ug walay hunong nga dedikasyon ni PCPT Deiparine, nga nagpasiugda sa iyang makahuluganon nga mga kontribusyon sa pagpanalipod sa komunidad ug pagpadayon sa mga mithi sa serbisyo sa pulisya.
Sa nahimong pakighinabi usab ngadto kang PNP Chief Nartatez nga kasamtangang giasikaso na ang mga benipisyo nga makuha sa pamilya ni Deparine ingun man ang mga gagmayng anak niini.
Gani, gitataw ni Nartatez nga adunay plano ang mga anak ni Deparine mga mamahimong pulis, mismong gikan sa pamulong ni Nartatez nga tabangan kini aron makasulod sa serbisyo.
Sumala pa, ang iyang presensya nagsilbing usa ka kapanaminan nga pahinumdom sa lawom nga pagtahod sa PNP sa mga sakripisyo nga gihimo sa mga personahe niini, ingon man ang lig-on nga pasalig niini sa pagsuporta sa mga nagbangotan nga pamilya sa ilang panahon sa pagkawala.
Subay niini, gidunol na usab sa Criminal Investigation and Detection Group (CIDG) Regional Field Unit 7 ang search warrant sa susamang adlaw, sa pinuy-anan ni Leonardo Rabago Manto, alyas “Jun,” kinsa ang primes suspek sa pagpatay kang Deparine, didto sa Sitio Balaw, Brgy. Sudlon II, dakbayan sa Sugbo.
Ang maong search warrant kabahin sa imbestigasyon sa pagpatay kang PCPT Deiparine ug pagkaangol ni PEMS Artchel C. Tero, parehong PNP personnel, niadtong Oktubre 25, 2025.
