Giisa na sa RED ALERT STATUS ang Cebu, diin alas 11:00 sa buntag, ang Camotes Islands gibutang ubos sa Signal No. 3 samtang ang Cebu gibutang ubos sa Signal No. 2.
Nakita ang mga indibidwal nga nag-panic buying sa ilang mga kinahanglanon, diin ang mga gasolinahan, grocery store, ug mga water refilling station adunay taas nga linya sa mga tawo aron makakuha sa ilang mga suplay.
Niining bahina, si Cebu City Mayor Nestor Archival ug Cebu Provincial Governor Pamela Baricuatro nagpagawas ug mando nga temporaryong nagsuspende sa trabaho sa tanang ahensya sa gobyerno.
Gimandoan usab ni Gov. Pam ang mga operator sa bus nga mohunong sa operasyon tungod sa Bagyong Tino, nga nakaapekto sa mga biyahe gikan sa mga terminal sa Cebu City, ug gitambagan ang mga pasahero nga planohon ang ilang mga biyahe sumala niana ug magpabilin nga updated.
Samtang, ang Cebu Port Authority (CPA) Main Office ug ang tanang Port Management Offices mobalhin usab ngadto sa Work-from-Home (WFH) setup sugod sa ala 1:00 sa kaadlawon karong adlawa, hangtod sa Martes, Nobyembre 4, 2025, ug ang passenger terminal temporaryo usab nga sirado ug dili ablihan sa publiko hangtod sa sunod nga pahibalo.
Gani ang Cebu Provincial Capitol nagpahigayon og coordination meeting gahapong adlawa, Nobyembre 3, uban sa Provincial Disaster Risk Reduction Management Council.
Diin gikabutyag ug mipasabot si Ainjeliz dela Torre-Orong, ang Cebu Provincial Information Officer, nga atol sa miting, giklaro nga ang Bagyong Tino dili sama ka kusog sa miaging mga bagyo nga Yolanda ug Odette, apan wala kini magwagtang sa panginahanglan sa pagpangandam alang sa kaluwasan sa tanan.
