Nagpasidaan ang Philippine Institute of Volcanology and Seismology (PHIVOLCS) sa publiko bahin sa posibleng pag-agos sa lahar gumikan sa kusog nga ulan tungod sa dili maayong panahon.
Kini nunot sa pag-agi sa Bagyong Verbena ug sa epekto sa shearline, busa gilauman nga magdala kini og kusog nga ulan sa Rehiyon sa Bicol.
Dugang niini nga ang Bulkang Mayon lagmit nga makamugna og lahar flow.
Hinungdan nga gipa-amping ang mga lugar sa Miisi, Binaan, Mabinit, Buyuan, Anoling, Matanag, Bonga, ug Basud Channels.
Maapektuhan usab ang lungsod sa Guinobatan, nga daling mabahaan panahon sa kusog nga ulan, labi na sa Masarawag ug Maninila Channels.
Sa pagkakaron, walay nakitang lahar flow, apan posible gihapon ang mga rockfall ug uban pang mga deposito gikan sa Mayon.
Bisan pa man og nagpabilin sa Alert Level 1 ang bulkan, gipasidan-an gihapon ang publiko sa posibilidad sa pagkahulog sa mga bato nga sama kadako sa mga balay.
Wala usab gisalikway ang posibilidad sa phreatic eruptions nga adunay abo, labi na karong panahon sa ting-ulan.
