Nibisita si Cebu Governor Pamela “Pam” Baricuatro sa Carcar City gahapong adlawa, Nobyembre 25, aron susihon ang kadaot sa baha tungod sa Tropical Depression Verbena, ingun man naghatag og inisyal nga tabang.
Subay sa pagbisita sa Gobernadora, giubanan kini ni Carcar City Mayor
Patrick Barcenas aron na usab sa pagsusi sa mga apektadong lugar, lakip na ang Sitio Luanluan spillway sa Poblacion 1.
Ubos sa direktiba sa gobernadora, ang Provincial Social Welfare and Development Office (PSWDO) mihatag dayon og tabang, nga nag-apod-apod og 1,000 ka hot meals, 1,000 ka bottled waters, ug 1,000 ka family food packs.
Samtang ubos sa preventive health measure, nag-apod-apod usab og mga kahon sa prophylactic antibiotics sa mga importanteng lokasyon, lakip na ang Carcar City Health Office nga adunay 150 ka kahon para sa pipila ka mga barangay, ang Super Health Center adunay 30 ka kahon, ug Carcar City Hall nga adunay 30 ka kahon para sa mga emergency responder ug mga empleyado.
Gani, naasoy ni Mayor Barcenas bahin sa gagmay nga kadaot sa istruktura ug preemptive evacuations, hinungdan nga ang Provincial Government motan-aw sa mga hinungdan sa pagbaha ug mohimo og mga solusyon kabahin niini.
