Nagpadayon ang sunog nga miugdaw sa Wang Fuk Court apartment complex sa Tai Po, Hong Kong ug nakapatay og labing menos 44 ka tawo, samtang anaa sa 300 ang gilista nga nawagtang.
Sumala sa pulis, posible nga misamot ang kalayo tungod sa dili luwas nga scaffolding, construction mesh, ug foam materials nga gigamit sa maintenance.
Nagtrabaho tibuok gabii ang mga bombero apan naglisod sila’g sulod sa taas nga andana tungod sa grabe nga kainit ug baga nga aso.
Nasuta nga ang complex adunay kapin 4,600 ka residente.
Giingon sa otoridad nga nakontrol na ang sunog sa upat ka bloke apan nagpadayon pa ang operasyon sa ubang tore. Nakit-an usab sa pulis nga ang uban nga bintana giselyohan og foam materials nga dili mosulod sa fire standards.
Tulo ka opisyal sa usa ka construction company ang gidakop sa kasong manslaughter tungod sa ilegal nga materyales.
Samtang, usa ka bombero ang apil sa patay ug 45 pa ka pasyente ang kritikal.
Kini ang pinakagrabing sunog sa Hong Kong sukad 1948, ug nakapahinumdom sa Grenfell Tower tragedy sa London.
