Gimando sa korte sa Pasig City ang pagbalhin sa gipalagpot nga Mayor sa Bamban, Tarlac nga si Alice Guo ngadto sa Correctional Institution for Women (CIW) sa Mandaluyong City human sa iyang pagkakonbikto sa kasong qualified human trafficking.
Base sa upat ka pahina nga mando gikan sa korte sa Pasig nga gipadala ngadto sa Corrections Superintendent sa CIW, sila si Alice Leal Guo, Rachelle Joan Malonzo Carreon, ug Jaimielyn Santos Cruz.
Gikonbikto si Guo sa Pasig Regional Trial Court Branch 167 human mapamatud-ang sad-an sa qualified human trafficking ug gisentensiyahan og tibuok kinabuhi nga pagkabilanggo.
Nagsang-at og mosyon ang kampo ni Guo nga kon mahimo, magpabilin siya sa Pasig City Jail Female Dormitory apan gibasura kini sa korte.
Gipasalig ni Bureau of Corrections (BuCor) Director Gregorio Catapang ang seguridad ug nga si Guo ibutang sa regular nga dormitoryo sa Maximum Security Camp.
