Giklaro ni Bureau of Corrections (BuCor) Director General Gregorio Catapang nga kinahanglan una nga mo-apply og ‘parole’ sila si Deniece Cornejo ug Cedric Lee sa dili pa sila makagawas.
Nahitabo kini human giusab sa Court of Appeals (CA) ang kaso batok sa duha gikan sa ‘illegal detention’ ngadto sa grave coercion.
Gimando usab sa CA ang pagpagawas kang Lee ug Cornejo human giusab ang ilang sentensiya.
Apan, gipahayag ni Catapang nga kinahanglan gihapon silang duha nga moserbisyo sa ilang sentensiya alang sa ‘grave coercion’ nga adunay silot nga unom ka bulan hangtod tulo ka tuig nga pagkabilanggo.
Giinsiter ni Catapang nga dili basta-basta mahuman o matuman dayon nila ang ilang sentensiya.
Matod niya, adunay gitakdang proseso nga angay sundon, busa dili sila mahimong motuman dayon sa mando sa CA nga dili mosunod sa maong pamaagi.
