Nakig-alayon ang Visayas Command sa uban pang sakop sa mga kapulisan sa Central Visayas subay sa pagmintinar sa kahapsay ug kalinaw sa umaabot nga pagpahigayon og Anti-Corruption Rally karong Nobyembre 30.
Kini ang gipahibalo ni Col. Israel Galorio, ang tigpamaba sa Armed Forces of the Philippines Visayas Command nga adunay ibutang nga mga personahe gikan sa VISCOM isip pag-abag kon gani adunay motumaw nga kagubot atol sa rally sa Sugbo nga nagpakita og suporta ug pagduyog sa kalihokan.
Bisan paman nga low enforcement effort ang direktiba apan nagpahigayon gihapon og mga koordinasyon tali sa ilang sakop ug sa kapulisan aron naka-standby ang ilang hanay kongani kinahanglan na og suporta ang mga PNP.
Busa, atol sa mass mobilization kay giawhag niini ang mga Sugboanon ug uban pang mosalmot sa rally nga mahimong responsable ug pilion ang malinawon nga pagpadayag kini subay usab sa gilauman nga tensyon tungod sa grabeng giagian sa Sugbo sa milabay nga mga kalamidad nga mikalas og kinabuhi ug miguba og mga kabtangan.
Sa pikas bahin, padayon ang panawagan sa lain-laing grupo sa publiko nga mosalmot sa ipahigayon nga Anti-Corruption Rally.
Diin nanguna sa niawhag ang Simbahang Katoliko, Sugboanong Pakigbisog Kontra Korapsyon” “SuPaKK, Panaghiusa sa Yanong Sugbuanon Batok sa Korapsyon (PAYONG), Bayan Central Visayas.
Napaambit usab ni Jaime Paglinawan, ang Chairman sa Bayan Central Visayas nga lakip sa ilang panawagan kay ang BBM-SARA resign, ingon man ang tanang nalambigit sa kurapsyon sa nasud.
Gibarugan niini nga dili sila mohunong sa pagsinggit hangtud nga madungog ug dunggon ang ilang mga tingog.
