Nadakpan ang duha ka lalaki nga makaduha ka higayon nga nanulis, human nagmalampuson ang pag-ginukdanay sa mga pulis sa lungsod sa San Fernando, alas 11:30 kagabii niadtong Nobiyembre 28, 2025 sa barangay Balud sa naasoyng lungsod.
Ang duha ka mga suspetsado diin usa niini nagpangedaron og 16-anyos samtang ang usa nailhan nga si John Alebhabe Ebales dela Cerna 24-anyos, kanhi merchandizer sa usa ka produkto ug si alyas Boy, 16, pulos taga Villa Bulsita, Barangay Bulacao ning dakbayan sa Sugbo.
Mao kini ang naasoy ni Pmaj. Michael Gingoyon, ang Hepe San Fernando Police Station atol na sa esklusibong pakighinabi kaniya sa Bombo Radyo Cebu team kaniya, diin iyahang naasoy nga una sila nanulis sa usa ka tindahan nga nahimutang sa Barangay Sangat San Fernando diin malampuson nila nga nakuha ang P6,000 nga halin sa J and E Store, lakip na ang mga butang sa usa sa mga trabahante niini.
Matod pa, ang mga biktima mao sila si Cecilio Briones Tago Jr., 53, tag-iya sa tindahan, Justin Recopelacion Roma, 19-cashier, ug si Jacklyn Lawas Barbadillo, 40, tindera nga pulos taga Barangay Sangat, kinsa wala maka lihok sa dihang gipagawas ang armas sa mga suspetsado.
Subay niini, human makuha ang kwarta ug butang sa usa sa mga trabahante, misakay kinig balik sa motorsiklo dayong sibat paingun sa dakbayan sa Naga.
Apan dali nga nanawag sa San Fernando Police Station silang Roma ug Barbadillo ug gihulagway sa mga saksi ang motorsiklo nga gigamit sa mga suspetsado lakip na ang plate number nga GD433C nga dunay kombinasyon nga color sa puti ug itom.
Busa, sa dihang padung na ang mga sakop sa kapulisan sa dapit diin nahitabo ang pagpanulis, ilang nabatyagan nga dunay nahitabong komosyon sa 24 hours nga tindahan sa Barangay Balud San Fernando, dayun ni mando si PMAJ. Gingoyon og hot pursuit operation aron nga susihon ang maong kagubot apan kalit lang nga dunay tawo nga mipara nila ug mipahibawo nga sila gitulis.
Sunod niana, daling gilusad ang manhunt operation ug gisundan ang motor nga gisakyan sa duha, ug ila kining na-corner sa sudlonong bahin sa Barangay Balud nga paingun na sa bukirang dapit sa lungsod nga mi resulta sa ilang pagkasikop. (via Koky Cabatingan)
