Idili sa Kagamhanan sa Dakbayan sa Sugbo, ang pagbiyahe o pagpamasahero sa mga nagkadaiyang Eletric-Bicycles nga anaa naglatas sa mga dagkong kadalanan sa dakbayan.
Kini ang gibutyag ni Cebu City Mayor Nestor Archival, atol sa pagpakighinabi sa mga tigbalita niadtong Lunes Disyembre 1, nga idili ang mga E-bikes sa mga main roads.
Sigon usab niini, nga daan nang adunay balaud ang kagamhanan sa dakbayan sa pagpanakop sa mga E-bikes ug gihatagan ra nilag lugway ang mga E-bike drivers nga adto lang sa mga kadalanan nga dili latasan sa mga dagkong sakyanan gumikan kay risgo kini sa mga drivers og lakip na sa mga pasahero niini.
Gihimug-atan niini nga kinahanglan gayud nga i-ban ang mga E-bikes gumikan kay dugay na kining gipatuman sa Cebu City Transportation, og karon lang gihugtan sa Land Transportation Office ang pagpanakop niini.
Sagad makit-an ang mga E-bikes nga maglatas sa mga lugar doul sa Carbon, Mambaling, padulong sa mga dagkong Mall sa Sugbo.
Gihangyo usab sa Mayor, nga likayan lang pagbiyahe sa mga dagkong kadalanan aron sa paglikay sa mga risgong panghitabo.
