Wala mawad-an og paglaum si Department of the Interior and Local Government (DILG) Secretary Jonvic Remulla nga madakpan ang kanhi Ako Bicol Party-list Representative nga si Zaldy Co bisan pa sa mga babag sa extradition.
Gituohan nga si Co anaa karon sa Portugal, diin, sumala ni Remulla, ang Pilipinas walay extradition treaty, busa iyang giingon nga ang kanhi magbabalaod lagmit nagtago.
Gipasabot usab ni Sec. Remulla nga ang Portugal mahimong limitahan ang pagpasaka og kaso depende sa giingong krimen.
Miingon siya nga kon ang krimen nahimo sa wala pa makakuha og Portuguese passport, dili siya mapasakaan og kaso, apan kon ang krimen nahimo human makuha ang maong passport, mahimong mapauli si Co.
Gipasiugda usab sa kalihim nga nagkagamay ang kalibutan ni Co ug nga pinaagi sa negosasyon, ang gobyerno sa Portugal mahimong maka-akomodar sa Pilipinas.
Gikumpirma ni Remulla kaniadto nga gikompiska sa NBI ang mga kabtangan nga gituohang nalambigit kang Co, lakip na ang iyang mga kabtangan sa Forbes Park ug sa Bicol.
Kahinumduman nga ang ngalan ni Co nalambigit sa gitawag nga pinakadakong eskandalo sa korapsyon sa mga ghost flood control projects ubos sa Department of Public Works and Highways (DPWH) ingon man sa isyu sa giingong pag-insert sa budget sa House of Representatives.
