Makadawat ang Department of Education (DepEd) og kapin sa P1.04 bilyon nga pondo para sa Special Needs Education (SNED) program sa sunod tuig.
Ang dakong pondo kabahin sa pagpalig-on sa ahensya sa programa aron mag-focus sa mga estudyante nga adunay espesyal nga panginahanglan, mga kakulangan, mga miyembro sa indigenous communities, mga out-of-school youth, ug uban pa.
Gusto sa DepEd nga adunay mas inklusibo ug patas nga mga oportunidad para sa mga estudyante nga adunay espesyal nga panginahanglan, pinaagi sa igong pondo, angay nga mga programa, ug igong gidaghanon sa mga magtutudlo aron magiyahan sila.
Para sa mga miyembro sa Indigenous Peoples Education (IPEd) program, adunay usab P154 milyon nga suporta para sa sunod tuig. Adunay kapin sa 482,000 ka mga IPEd learners nga gilauman nga makabenepisyo niini, samtang ang ahensya maggahin usab og P897 milyon para sa Alternative Learning System (ALS) sa 2026.
Matod pa, ang mas dakong pondo kabahin usab sa pag-focus sa ahensya sa halos 640,000 ka mga ALS learners, ug aron matabangan sila nga makapadayon sa ilang pagtuon.
Ingun man nga importante ang suporta para sa mga estudyante nga adunay espesyal nga panginahanglan, base sa gisugyot nga badyet nga giaprobahan sa Senado.
