Giimbitar sa Appeals Chamber sa International Criminal Court (ICC) ang Office of the Prosecutor ug Office of Public Counsel for Victims (OPCV) nga mosumiter og dugang obserbasyon sa pagbasura sa apela ni kanhi Presidente Rodrigo Duterte nga nagkuwestiyon sa hurisdiksyon sa kaso.
Sa unom ka pahina nga kamandoan nga pinetsahan og Disyembre 16, ang ICC Appeals Chamber miingon nga importante nga mahibaw-an nila ang tukmang disposal sa apela.
Gihatagan sila hangtod alas 4 sa hapon sa Enero 16, 2026 aron makasumite ug dugang nga obserbasyon.
Samtang gitugotan nga makatubag ang kampo sa kanhi presidente alas 4 sa hapon sa Enero 23, 2026.
Gisalikway usab sa ICC Appeals Chamber ang hangyo sa depensa nga hatagan sila og tubag sa komento sa Deputy Prosecutor kalabot sa apela sa mga abogado sa kanhi presidente diin walay hurisdiksyon ang ICC tungod kay miatras ang Pilipinas sa ICC.
Gihangyo usab sa Office of the Prosecutor ug OPCV ang ICCC Appeals Chamber nga ibasura ang apela sa depensa nga nagkuwestiyon sa hurisdiksyon sa kaso ni Duterte.
Ang Office of the Prosecutor nitataw nga ang kampo sa kanhi Presidente nagbalikbalik lang sa mga argumento nga una na nila nga gibasura.
