Gikumpirma sa Trial Chamber III sa International Criminal Court (ICC) nga si kanhi Presidente Rodrigo Duterte adunay kapasidad sa pag-apil sa mga proseso sa husay, base sa resulta sa mga medikal nga pagsusi sa mga eksperto.
Matod sa Chamber, igo ang ebidensiyang ilang nasusi aron matino nga makahimo si Duterte sa pag-apil sa mga proseso sa korte. Gikatakdang magsugod ang husay sa Nobyembre 30, 2026.
Gipagawas sa ICC ang maong desisyon gahapon Oktubre 8, base sa ruling nga gipetsahan niadtong Septiyembre 28.
Kahinumdoman nga atol sa ikatulong status conference niadtong Setyembre 16, mihangyo ang kampo ni Duterte nga ipahigayon ang dugang nga medikal nga pagsusi aron matino ang iyang kapasidad sa pag-atubang sa husay.
Nangatarungan ang depensa nga ang kanhing presidente nagpakita og mga timailhan sa pagkadaot sa iyang mga abilidad sa pangisip tungod sa katigulangon, nga mahimong makaapekto sa iyang pagsabot ug pag-apil sa mga proseso sa korte.
Sa maong desisyon, gisagop usab sa Trial Chamber III ang mga lakang aron mapadali ug masiguro ang epektibong pag-apil ni Duterte sa husay, samtang gipanalipdan ang iyang katungod sa makiangayon nga pagdungong.
Nag-atubang si Duterte og tulo ka kaso sa crimes against humanity nga may kalabotan sa giingong mga pagpatay atol sa kampanya batok sa ilegal nga droga, lakip ang panahon nga mayor pa siya sa Davao City ug sa iyang pagka-presidente sa Pilipinas.
