Naka-andam sa ilang seguridad ang Mactan Cebu International Airport Authority (MCIAA) atol sa gikatakdang pag-abot o pag-abot na sa tugpahanan sa Sugbo ni Sarah Discaya ug Maria Roma Angeline Rimando sa St. Timothy Construction nunot sa mando sa Korte Suprema nga ihikay sa Lapu-Lapu City Regional Trial Court sa kaso niini nga P96.5-milyones nga ghost flood control project sa Davao Occidental.
Kini ang gikabutyag ni Julius Neri Jr., ang General Manager sa MCIAA sa pakighinabi niini sa Bombo Radyo Cebu News Team diin gisaysay sa opisyal nga mimando kini sa pagsiguro sa safety ug security sa tanan nga dili makamugna og kasamok nga gihulagway isip business as usual.
Gisaysay pud niini nga walay special treatment ipatuman sa pag-abot ni Discaya ug Rimando tungod kay adunay silay regular na daan nga security protocol nga istriktong gipatuman sa airport sa Mactan.
Una niini, kaganihang pasado ala 1 sa hapon miabot sab ang lain mag-atubang og kaso saghost flood control project nga gikan sa DPWH-Davao Occidental nga mao sila Rodrigo Larete, Michael Awa, Joel Lumogdang, Harold John Villaver, Jafael Faunillian, Josephine Valdez, Ranulfo Flores, ug si Czar Ryan Ubungen.
