Namatay ang usa ka Russian Lieutenant General nga giila nga si Fanil Sarvarov human mibuto ang bomba nga gitanom ilalom sa iyang sakyanan sa Moscow, matod sa Investigative Committee sa Russia.
Si Sarvarov kinsa 56 anyos, mao ang pangulo sa operational training department sa armadong kusog, ug nagtuo ang mga awtoridad nga nalambigit ang Ukrainian intelligence, apan wala pay opisyal nga pahayag gikan sa Ukraine.
Ang mga litrato gikan sa eksena nagpakita sa usa ka puti nga sakyanan nga nabungkag ang mga pultahan niini sa usa ka parkinganan duol sa usa ka apartment block sa lugar.
Samtang ang mga awtoridad sa pikas nasud nagsang-at og mga kaso sa pagpatay ug ilegal nga pagpamaligya og mga eksplosibo.
Si Sarvarov usab nailhan tungod sa iyang mga operaation combat atol sa panagbangi sa Ossetian-Ingush ug sa mga gubat sa Chechen sa 1990s ug sayong bahin sa 2000s, ug usa usab siya sa mga lider sa operasyon sa Syria sa 2015-2016.
Si Presidente Vladimir Putin sa Russia gipahibalo dayon sa kamatayon ni Sarvarov, matod sa Kremlin.
Nahibal-an nga sukad gisugdan sa Russia ang hingpit nga pagsulong niini sa Ukraine kaniadtong Pebrero 2022, daghang mga opisyal sa militar ang gitarget sa mga bomba sa awto sa Moscow.
