Sugod sa buwan sa Pebrero, ang estrikto nga pagpatuman sa mga basura nga wala gi-segregate dili kolektahon, ug ang mga makalapas niini mag-atubang og mga silot.
Mao kini ang gibutyag ni Cebu City Mayor Nestor Archival Sr. nga sugdan na sa sunod buwan ang pagpatuman sa no segregation, no collection policy.
Ipatuman ang programa sa pipila ka mga hugna, diin ang unang duha ka semana sa Enero, igahin alang sa mga information drive sa mga tunghaan, barangay, ug mga opisina sa dakbayan.
Samtang sa tunga-tunga sa bahin sa Pebrero, ang mga tigkolekta og basura magsugod sa pagpatuman sa mga lagda sa pagsegregate, pag-isyu og mga pasidaan apan walay multa.
Giklaro usab ni Archival nga ang polisiya sa segregate sa solid waste sa dakbayan magpadayon bisan pa sa mga kakulian niini.
Ang mga basura nga madunot kolektahon nga gilain ug iproseso sa composting facility sa Kalunasan, Samtang ang mga nahabilin nga basura sama sa mga plastik padayon nga dad-on sa landfill, ug ang mga botelya sa PET iproseso ug isagol sa aspalto para sa mga proyekto sa dalan.
Hinoun giila ni Archival ang mga kalisud sa logistik, nga limitado nga agianan paingon sa landfill, labi na nga kay lisod ang ruta sa Bacayan Bridge.
Gipasiugda ni Archival nga ang kalampusan sa programa nagdepende sa kolektibong paningkamot, gikan sa mga panimalay ug eskwelahan hangtod sa mga barangay ug mga opisina sa siyudad.
