Nanawagan na usab si Pope Leo XIV alang sa usa ka adlaw sa kalinaw sa tibuok kalibutan, bisan pa man og Pasko lang, nga dungan sa pagkatawo sa atong manluluwas nga si Jesukristo.
Sa iyang pakigpulong sa mga tigbalita sa gawas sa palasyo sa Papa, ang Santo Papa mitubag sa pipila ka mga pangutana bahin sa gubat sa Ukraine.
Sumala ni Papa Leo, usa sa mga butang nga nakapasubo kaniya niining mga adlawa mao ang kamatuoran nga gisalikway sa Russia ang hangyo alang sa usa ka Christmas truce o ceasefire.
Niining bahina, gibag-o sa Santo Papa ang iyang panawagan alang sa paghunong sa mga panag-away sa Pasko ug naglaum nga ilang tumanon kini nga panawagan sulod sa 24 oras o usa ka tibuok adlaw nga kalinaw sa tibuok kalibutan.
Samtang, wala kapugngi sa Santo Papa ang pagpahayag sa iyang kasagmuyo sa bag-ohay lang nga pag-apruba sa iyang estado sa Illinois sa assisted suicide para sa mga hamtong nga adunay mga sakit nga terminal o usa ka prognosis nga unom ka bulan o mas mubo pa sugod sa Septyembre 2026.
Niining bahina, gidapit ni Pope Leo ang tanan, ilabi na karong panahon sa Pasko, sa pagpamalandong sa kinaiya ug bili sa kinabuhi sa tawo.
Ang Santo Papa miingon nga ang Dios nahimong unod sama kanato aron ipakita kung unsa ang tinuod nga kahulugan sa kinabuhi.
Busa, kini ang paglaum ug pag-ampo sa lider sa Simbahang Katoliko nga ang pagtahod sa kinabuhi sa tawo motubo pag-usab sa matag gutlo, gikan sa pagpanamkon hangtod sa natural nga kamatayon.
