Nanawagan si Pope Leo XIV nga tapuson na ang gubat sa Ukraine ug respetohon ang international humanitarian law human misaka ang ihap sa mga sibilyan nga namatay sa duha ka habig.
Sa iyang mensahe sa wala pa ang pag-ampo sa Angelus, nanawagan ang Santo Papa nga hunongon na ang mga pag-atake batok sa mga inosenteng sibilyan, lakip na ang mga bata.
Sumala sa datos sa United Nations, kapin sa 16,000 ka sibilyan ang namatay sa hapit upat ug tunga ka tuig nga gubat tali sa Ukraine ug Russia, kadaghanan kanila mga Ukrainians.
Giingon usab sa UN human rights office nga misaka og kapin sa ikatulo ang gidaghanon sa mga sibilyan nga namatay ug nasamdan sa Ukraine sa unang katunga sa tuig.
Samtang, nagpadayon usab ang Ukraine sa sunod-sunod nga pag-atake gamit ang mga drone sa Russia.
Sumala sa usa ka opisyal sa UN, naapektuhan usab ang mga sibilyan sa Russia.
Sa pinakabag-o nga insidente, nadaot ang pantalan sa Odesa tungod sa tibuok-gabii nga pag-atake sa Russia, sumala ni Ukrainian President Volodymyr Zelenskiy, kung diin, walo ka tawo ang nasamdan sa siyudad.
Sa Russia, lima ka tawo usab ang namatay sa pag-atake gamit ang drone sa Ukraine sa siyudad sa Belgorod, sumala sa regional crisis center.
