Gipahinumdoman ni Cebu Archbishop Alberto “Abet” Uy ang mga Sugboanon nga taliwa sa mga hagit nga nihapak sa Sugbo partikular na ang mga linog ug pagbaha nga nagbilin og kasakit ug kawalay kasiguroan, gidapit gihapon niini ang tanan nga ipadayon ang paglaum.
Kini gumikan gipili sa Dios nga mopuyo uban kanato—dili sa kahupayan, kondili taliwala sa mga pagsulay—ug sa Bata sa pasungan, ingon man nga iyang gipasaligan ang iyang katawhan nga dili gayud siya mobiya.
Nibubo usab kini og pasalamat sa mga biktima sa Magnitude 6.9 nga linog sa Amihanang Cebu atol sa ika-siyam nga Adlaw sa Misa de Gallo tungod kay bisan paman sa tanang panghitabo ning tuiga, anaa gihapon ang hugot nga pagtuo sa mga tawo ug misalig sa iyang gahum.
Ingon man nga subling gipahinumdoman sa Arsobispo sa Sugbo ang mga Sugboanon nga wala giluwas sa Dios ang kalibutan pinaagi sa pagtukod og usa ka butang nga impresibo inay miabot kini isip usa ka bata, gamay, mapaubsanon, ug huyang.
Lakip usab sa mga pulong nga gisabwag sa Arsobispo nga matud niini dili ang gahum, pagkontrol, ug garbo ang makapausab sa kinabuhi kondili ang gugma, pagsalig, ug pagkamapaubsanon.
