CEBU CITY- Naghatag og espesyal nga mensahe si Cebu Archbishop Alberto “Abet” Uy, Arsobispo sa Archdiocese of Cebu alang sa mga inahan atol sa pagsaulog sa Mother’s Day, diin iyang gipasiugda ang papel sa gugma ug sakripisyo sa Kristohanong pagkinabuhi.
Sa iyang homiliya, giingon sa Arsobispo nga ang pagtuo dili lamang mahitungod sa pagsunod sa mga lagda sa simbahan, kundili sa pagpalig-on sa relasyon uban kang Hesukristo.
Gibase ni Uy ang iyang mensahe sa Juan 14:15 nga nagaingon, “If you love me, you will keep my commandments,” diin iyang gipasabot nga ang tinuod nga pagsunod sa Ginoo nagagikan sa gugma ug dili sa pagpugos.
Gihisgutan usab niya ang mga inahan isip ehemplo sa walay kondisyon nga gugma ug paghalad sa kaugalingon alang sa pamilya.
Matud niya, sama sa usa ka inahan nga andam mosakripisyo alang sa iyang anak, ang mga Kristohanon gitawag usab sa matinud-anong paghigugma ug pagsunod kang Kristo.
Giingon pa sa Arsobispo nga daghang mga tawo ang anam-anam nga nahilayo sa ilang pagtuo dili tungod sa pagkawala sa pagtoo sa Diyos, kundili tungod sa pagbugnaw sa ilang relasyon Kaniya.
Sa pagtapos sa iyang mensahe, gipadayag ni Uy ang iyang pagpasalamat ug pagpasidungog sa tanang inahan alang sa ilang gugma, pagkamainantuson, ug dedikasyon sa pag-amuma sa ilang pamilya.
